SANIMAN MASUK SAKULAHAN

Oleh: Nor Aniyah, S.Pd

Han, bujuran kah cagar ada SMS ka sakulahan-sakulahan? Maka SMS tih nang biasa gasan pasan handap di hapi kita? Uuu, lain ngitu SMS nang dimaksud sakalinya.

Prugram Garakan Saniman Masuk Sakulahan (GSMS) wayahini ngitu nang ditatapakan Kamandikbud gasan mambantuk pandidikan karaktir murid di tangah kumpatisi ira milinial. Prugram ngini dinilai kawa marangsang nalar murid gasan sasain manganal wan mangatujui budaya lukal.

Kapala Dinas Pandidikan wan Kabudayaan Kalsel, M Yusuf Effendi, manyambat SMS sabuting cara panguatan karaktir malalui sani budaya wan kaaripan lukal, nang mangajarakan kamampuan pandidikan karaktir. Diharapakan SMS bakalanjutan. Di Kalsel sudah dilakuakan di 40 sakulahan, kalunya kawa tahun 2018 kaina inggan 60 sakulahan nang dimasuki prugram SMS ngini. (Banjarhits.id, 15/04).

Garakan Saniman Masuk Sakulah (GSMS) nang digalakakan lawan dilaksanaakan pamarintah malalui Kamantrian Pandidikan wan Kabudayaan ngini sabujurnya manjadi sabuah wadah pambangunan karaktir bangsa mamahami kabhinikaan wan kakayaan bangsa tarhadap sani budaya.

Nang kaya tatuang dalam samangat lawan pilusupi Nawacita Ripublik Indunisia puin ka sambilan gasan managuhakan kabhinikaan diparkuat lawan babarapa undang-undang wan paraturan pamarintah, prugram ngini manjadi sabuting sanjata mamparkuat wan manjaga kasatuan bangsa. Salain ngitu, GSMS manjadi wadah partamuan saniman lawan kakanakan sakulahan nang bausia prudiktif gasan maningkat akan krIatipitas buhan murid.

Kasanian masuk sakulahan gasan maangkat budaya banjar, barait lawan usaha maningkatakan kadatangan wisata ka banua imbah Pistipal Budaya Banjar di Jakarta sumalam. Budaya wan pariwisata cagaran maulah ganal paningkatakan parikunumian urang banua.

Nang kaya bubuhan wisatawan Mancanagara (Wisman) lawan Wisatawan Nusantara (Wisnus) nang bajalanan ka Kabupatin Hulu Sungai Selatan (HSS), sasain tahun mangin babanyak. Lamun dihitung-hitung Wisman lawan Wisnus saku inggan 180.210 urang, Wisman 365 urang lawan Wisnus 179.845 urang.

Angka tahun ngini pabila dibandingakan lawan bulan nang sama di tahun 2017 sumalam, mangalami paningkatan sabanyak 32.401 urang, Par Juli 2017 tutal kadatangan Wisman lawan Wisnus sakitar 147.809 urang haja, yakni Wisman 209 urang dan Wisnus 147.595 urang. Pamarintah Provinsi Kalimantan Selatan (Kalsel) baik dalam paningkatan kamudahan (aksibilitas), prumusi, lawan palaksanaan event pariwisata, baparan banar dalam paningkatan jumlah kadatangan Wisman lawan Wisnus ka Kabupaten HSS khususnya, di Kawasan Stratigis Pariwisata Nasiunal (KSPN) Loksado. (Kalsel, antaranews.com, 02/08).

Kaaripan lukal mudahan jangan maulah buhan kakanakan kita manjadi haur karamian ngitu haja. Ujar tih, garakan ngini cagar manjadi prugram tambahan banyak sakulahan di Banjarmasin. Samantara, kagiatan kaagamaan nang kaya Rohis sasain hinip. Padahal kalu, pamahaman agama panting banar jua gasan sangu manjalani kahidupan. Pamahaman agama pang nang sabujurnya maulah kakanakan kita kawa mambidaakan, mana nang baik mana nang kada. Kawa mamilih nang bujur manjauhi nang tasalah, bapingkut lawan akidah.

Asa sadih banar pang, amunnya taalihakan parhatian kita jua. Kaya mambuktiakan wadah kita, wayahini sasain jauh hudah lawan pamahaman Islam nang sabujurnya. Nang kaya buhan padatuan lawan tuan guru kita, nang manjalanakan syariat manyaluruh (kaffah) pas dahulu. Wayahini digantiakan lawan mangatujui pamahaman budaya haja. Gairnya, amun budayanya ngitu sabujurnya kada baik atawa tacampur-tacampur kasyirikan, kaya dimapa? Nang kaya batatarian mamuja ruh ghaib nang kada dibulihakan ulih agama kita. Naudzubillahi min dzalik.

Napa garang jadi budaya lukal nang sasain diramiakan lawan diprumusiakan? Sakalinya, sakira gasan manariki bubuhan wisatawan, di dalam nagri tamasuk jua wisatawan luar nagri. Pacang rami urang asing datangan ka banua. Imbah ngitu, buhan inpistur suwasta katuju bainpistasi di banua kita. Hann, ngintu tih sakalinya.

Tapi, ngini sabujurnya banyak banar dampak nigatif, nang kada baik. Tamasuk malunturakan mural umat malalui budaya wan pariwisata, sahibar alasan kaina pacang dapat kauntungan ikunumi. Budaya lukal nang dipartahanakan kaya tatarian, makanan, lawan adat istiadat lainnya, kadada baisi kamampuan gasan mancagah rusaknya mural nang diimpur matan Barat, nang bangaran kabibasan.

Kabiasaannya bubuhan wisatawan wan turis asing nang bakalakuan saraba bibas sakahandak, kaya bamaukan, maubat, bagaul bibas lawan bazina, ngitu nang rahat digawinya di sakitaran pariwisata. Ngini cagar mampangaruhi banar lawan banua kita. Minta disadiakan minuman alkuhul, badiri hutil-hutil, hampai sasain bamunculannya warung-warung acil jablay. Nang harus diadakan gasan malayani buhannya, imbah ngitu masyarakat dimintai sakira manarima wan mambiarakan haja. Balum lagi, kakanakan kita nang anum-anum cagar kahilangan karaktir lawan kapribadian Islam, malah taumpati gaya hidup Barat nang buhannya bawa.

Sabujurnya, Islam hudah baisi kabudayaan nang khas, nang talahir tumatan “ideologi,” alias pamandangan  kahidupan Islam. Nah, budaya ngitu tamasuk “Hadharah.” Hadharah ngini amun manurut Islam batujuan gasan mambaikakan kahidupan manusia barataan, tautama banar umat Islam. Sakira kawa manuju paradaban Islam nang khas wan unik, talabih mulia banar ha pulang. Maumpati nang kaya dicuntuhakan Rasulullah, sahabat Rasulullah, buhan khalifah lawan alim-ulama pandahulu kita.

Islam sabagai panata kahidupan nang dipakai mastinya maatur sabarataan aspik kahidupan. Tumatan bangun guring babuncilak mata, hampai nang kaya apa mambangun nagara. Samunyaan ada syariatnya, baik gasan bapancaharian ikunumi, susial, pulitik, kasihatan, pandidikan wan nang lain-lainnya. Langkap lawan bungas banar pang! Jadinya, kabudayaan nang kada sasuai lawan Islam mastinya dihilangankan haja, ditinggalakan atawa kada usah diamalakan sama sakali.

Pambangunan pariwisata dalam pamandangan Islam baraitan jua lawan jaminan mahindari karusakan mural. Pabila pacang mandatangakan karusakan kada harapan dijadiakan prugram, sakalipun mandapatakan pamasukan kauntungan. Dalam sistim ikunumi Islam, priuritas pambangunan bangsa gasan mandiri lawan sajahtara kada malalui pariwisata, nang sabujurnya sahibar mauntungakan pangusaha lawan suwasta. Tapi, pambangunan industri gasan maulah kamandirian bangsa lawan mamanuhi kabutuhan pukuk rakyat dalam nagrinya.

Lawan jua, paningkatan ikunumi ngitu kawa haja kada malalui pariwisata. Malah kada parlu. Kanapa? Karana sabujurnya kita nih sugih. Pabila pangalulaan sumbar daya alam (SDA) nang ampun kita barataan, kaya hutan, batu bara, minyak gas wan amas dikalula akan ulih nagara. Kada sakira malimpah. Cuba pang dikalula akan bujur-bujur sasuai syariat. Pasti ngitu gin cukup banar gasan mahidupi anak-bini, masyarakat lawan manyajahtra akan umat Islam sabarataan.[]

*) Pemerhati Masalah Sosial dan Generasi, tinggal di Hulu Sungai Selatan (HSS), Kalsel.

Mari berkunjung ke akun Muslimah Banua News
FB fanpage :
Muslimah Banua News

Instagram :
@muslimahbanuanews
@muslimahbanuanews
@muslimahbanuanews

Youtube like, share, subscribe
MUSLIMAH BANUA NEWS

#MuslimahBanuaNews
#MuslimahBanuaMenulis